Gazetari turk Can Dundar është dënuar me më shumë se 27 vjet heqje lirie me akuzën për terrorizëm.
Dundar, redaktor i gazetës CumHuriyet, u arratis drejt Gjermanisë në vitin 2016 përpara se të shpallej fajtor nga gjykata e Stambollit. Ai u dënua me 18 vjet e nëntë muaj për “sigurimin e informacionit konfidencial për spiunazh” në lidhje me gazetarinë e tij, dhe 8 vjet e nëntë muaj të tjerë për ndihmën e ndjekësve të klerikut Fethullah Gylen, të cilin Ankaraja e fajëson për përpjekjen e grushtit të shtetit 2016.
“Mesazhi që qeveria turke po dërgon duke ndëshkuar një gazetar kaq ashpër është se nëse ju mbuloni çështje të ndjeshme, kjo do të ndodhë me ju. Frika ime është se ky vendim do të pengojë më tej gazetarët ende në Turqi të bëjnë punën e tyre,’’ u shpreh Dundar.
Dündar, një kritik i zëshëm i presidentit turk, Rexhep Tajip Erdogan, është një nga më të njohurit e mijëra gazetarëve, politikanëve, akademikëve, avokatëve dhe nëpunësve civilë turq të cilët janë përfshirë në kundërshtimin e shtypjes nga shteti turk në kohët e fundit. Mediat kritike janë mbyllur ose janë blerë nga njerëz me lidhje me partinë në pushtet të Erdoganit.
Qeveria pohon se gjykatat e Turqisë funksionojnë në mënyrë të pavarur dhe se veprimet e saj justifikohen nga kërcënimet e ashpra me të cilat përballet vendi.
Autoritetet turke kanë kërkuar tashmë ekstradimin e Dündar nga Gjermania dhe ngrirjen e pasurive të tij në Turqi në tetor.
Sipas raportit vjetor global të Komitetit për Mbrojtjen e Gazetarëve, lëshuar javën e kaluar, Turqia u rendit e dyta pas Kinës për burgosjen e punonjësve të medias. /The Guardian
