Belgjika ka identifikuar katër raste të variantit të ri të koronavirusit i cili u zbulua në Mbretërinë e Bashkuar, sipas zyrtarëve shëndetësorë për AFP.
Katër rastet u zbuluan në fillim të muajit në rajonet veriore flamande, që kufizohen me Holandën, bazuar në deklaratën e zëdhënësit të ministrisë së shëndetësisë në Belgjikë, Jan Eyckmans.
Varianti i ri që u identifikua për herë të parë në Mbretërinë e Bashkuar, i cili raportohet të jetë 70 për qind më i transmetueshëm, por jo aq i rrezikshëm.
Lidhur me këtë rast, shumë vende të botës kanë vendosur të ndalojnë udhëtimet nga Britania.
Organizata Botërore e Shëndetësisë paralajmëroi kundër alarmit të madh për variantin shumë infektiv, duke thënë se kjo ishte një pjesë normale e evolucionit të një pandemie.
“Ne duhet të gjejmë një ekuilibër. Është shumë e rëndësishme të kesh transparencë, është shumë e rëndësishme t’i shpjegosh publikut të vërtetën ashtu siç është, por është gjithashtu e rëndësishme të pranosh që kjo është një pjesë normale e evolucionit të virusit”, deklaroi shefi i urgjencave të OBSH-së, Mike Ryan në një konferencë online.
