Kryebashkiaku në largim i Rio de Janeiro Marcelo Crivella, një aleat besnik i presidentit të djathtë ekstremist të Brazilit, Jair Bolsonaro , është arrestuar nën akuzën për korrupsion.
Ngjarja ndodhi rreth orës 06:00 të mëngjesit të kësaj të marte, ku katër furgona policie dhe një grup prokurorësh mbërritën në shtëpinë e kryetarit të bashkisë në lagjen e pasur Barra da Tijuca.
Në bazë të përgjimeve prokurorët kishin arritur të mblidhnin prova që faktojnë përfshirjen në afera korruptive të kryebashkiakut. Gjithashtu hetuesit kishin zbuluar se një organizatë kriminale e mirëstrukturuar dhe komplekse e udhëhequr nga Crivella kishte vepruar në bashkinë e qytetit që nga viti 2017.
Crivella është një peshkop ungjillor dhe ish -enator, i cili shërbeu si ministër i peshkimit në qeverinë e Dilma Rousseff. Ai është nipi i Edir Macedo, i cili themeloi kishën ungjillore me emër “Kisha Universale e Zotit”. Mauro Macedo, kushëriri i Edir Macedo dhe ish arkëtari i fushatës së Crivella, gjithashtu u akuzua dhe u arrestua.
