Analisti dhe aktivisti kosovar, Rron Gjinovci, i ftuar në emisionin e Adi Krastës në SYRI TV, komentoi protestat për vrasjen e të riut Klodian Rasha.
“Natyrisht që e konsideroj vrasje. Nuk e di motivin e vrasësit, por ajo që di unë është se në Policinë e Shqipërisë ekziston një mentalitet i dhunës ndaj qytetarëve shqiptarë. Këtë mentalitet e tregoi edhe në pesë ditët e protestës që pasoi vrasjen. E kam fjalën për gazin lotsjellës, për topat me ujë. Ato përdoren kur në rrugë janë mijëra njerëz të shfrenuar, të cilët janë duke rrezikuar seriozisht sigurinë publike,” tha ai.
“Në Shqipëri shohim vetëm fasadë. Gjithandej në Shqipëri është punuar me fasadë të jashtëzakonshme, sidomos në Tiranë. Shqipëria ka numrin më të madh të azilkërkuesve në BE pas Sirisë që është në luftë.
Jam shqetësuar kur një politikan atje ishte i brengosur për djegien e pemës së Krishtlindjes. Si mund të krahasohet jeta e njerëzve me fasadën e pemëve?
Jeta në Shqipëri nuk është aspak jeta që shihet në Tiranë. Tirana është bërë një xhungël betoni me kulla, ndërkohë që në fshatra toka punohet me metodat më primitive,” tha Gjinovci.
Më pas ai komentoi edhe fjalimin e Vjosa Osmanit në parlamentin shqiptar.
“Zonja Osmani nuk tha asgjë të jashtëzakonshme. Ajo tha gjëra universalisht të vërteta. Ndaj jam habitur me reagimin për fjalimin e saj,” tha ai.
