Mbyllet në barazim pa gola sfida mes Partizanit dhe Bylisit e vlefshme për javën e nëntë në Kategorinë Superiore.
“Demat” humbën një shans të mirë për t’iu afruar kreut të renditjes, pas humbjeve të Vllaznisë dhe Kukësit në transfertë.
Pa Ilir Dajën e sëmurë, Partizani u drejtua në stol nga ndihmësi Kalari. Pjesa e parë nisi me duele të forta teksa nuk munguan rastet nga të dy krahët. Asani, Bardhi dhe Solomon u shfaqën të rrezikshëm për vendasit, teksa Edison Ndreca pati shanset e tij për miqtë nga Ballshi.
Pjesa e dytë vijoi të jetë e fortë dhe tepër e luftuar, por asnjë nga skuadrat nuk ia doli të dërgojë topinë në rrjetë. Përballja e luajtur në “Elbasan Arena” përfundoi 0-0 dhe të dky skuadrat ndanë nga një pikë.
Kjo ishte ndeshja e katërt pa fitore dhe pa shënuar gol për ekipin kryeqytetas, që mban vendin e tretë me 13 pikë pas fazës së parë. Barazim i rëndësishëm për Bylis, që regjistroi takimin e dyta radhazi pozitiv.
