Nga BoldNews.al
Ujësjellësi i Durrësit ka shpallur fitues të tenderit për rikonstruksionin e një pjese të zonës së Ishmit, me fond limit mbi 300 mijë euro, konkurentin e vetëm që ishte në garë, bashkimin e operatorëve “G.A.C” shpk dhe “Lala”.
Sipas të dhënave zyrtare, rezulton se bashkimi i operatorëve “G.A.C & Lala” kanë qenë të vetëm në këtë procedurë dhe, rrjedhimisht janë shpallur edhe fitues.
Tenderi është hapur në 20 Tetor të këtij viti dhe rezultati është shpallur në 15 Dhjetor 2020.
Ujësjellës-Kanalizime Durrës ka vënë rreth 350 milionë lekë (të vjetra) pa TVSH për rikonstruksionin e rrjetit hidrik në Shkafane dhe Lagjet Muzhaq-Kulls.
Operatori i vetëm në garë, njëkohësisht edhe fitues, ka paraqitur ofertën për të kryer shërbimin për një vlerë prej 310 milionë të vjetra pa TVSH (rreth 300 mijë euro).
Anëtari kryesor i grupit fitues, “G.A.C” shpk është krijuar në vitin 2016.
“G.A.C” shpk është në pronësi të Klodian Alimadhi dhe Hajrie Cinga. Aksioneri kryesor, Alimadhi, duket se është i lidhur shumë me familjen Cinga.
Krahas faktit që është ortak me Hajrie Cingën, ai është promovues permanent i materiale reklamuese të biznesit të kompanisë “Shansi Invest”, në pronësi Shpëtim Cingës, babait të ortakes së tij.
Bizneset e familjes Cinga kanë qenë me fat në tenderat publikë.
“G.A.C” shpk ka fituar një sërë tenderash, duke qenë kryesisht në bashkëpunim me “Shansi Invest”.
Por, ajo që ka rezultuar më e sukesshme në familjen “Cinga” është padyshim kompania “Shansi Invest”.
Sipas të dhënave të portalit të specializuar për transaksionet shtetërore, rezulton se, në periudhën 2015-2019, “Shansi Invest” ka arkëtuar rreth 3.6 miliardë lekë të vjetra fonde publike nga institucionet qendrore dhe lokale.
Por, fitimin më të madh, “Shansi Invest” e ka pasur nga tenderat e zhvilluar prej Ndërmarrjeve Publike, një prej të cilave është edhe Operatori i Sistemit të Transmetimit (OST).
Në një raportim të mëhershëm, “Boldnews.al” konstatoi se kompania e Shpëtim Cingës, si operator i vetëm apo bashkim operatorësh, është shpallur fitues në tenderat me fond limit rreth 20 milionë euro, të zhvilluara nga OST, në periudhën 2019-2020, kohë që ai institucion drejtohet nga Skerdi Drenova.
