Covid-19 ka pushtuar institucionin e vuajtjes së dënimit në Berat, ku përveç policëve e gardianëve virusi ka prekur edhe të burgosurit. 5 policë të regjimit të brendshëm dhe atij të sigurisë dhe 2 të burgosur janë konfirmuar sot “pozitivë” me SarsCov-2. Infektimi i të burgosurve ka shtuar frikën dhe panikun mes të gjithë të burgosurve dhe stafit të Burgut.
Pas shtimit të infektimeve në këtë institucion, Inspektoriati i Higjienës ka kryer mbrëmjen e sotme dezinfektimin e të gjitha ambienteve të brendshme dhe qelive të burgut. Dhjetëra të burgosur janë vendosur në karantinë në qelitë e tyre, deri në pritjen e përgjigjeve të tamponëve të kryer, ndërkohë që mjekët epidemiologë po vijojnë hetimin e rasteve të kontaktit.
Edhe pse infektimet brenda Burgut të Beratit kanë qenë të vazhdueshme gjatë 2-muajve të fundit, rastet kanë qenë të pakta dhe infektimet nuk ishin shtrirë mes të burgosurve, të prekur ka pasur vetëm në radhët e gardianëve dhe punonjësve të administratës. Aktualisht në të gjithë qarkun e Beratit janë 914 raste aktive, ndërkohë që numrat e të infektuarve ditorë rriten nga dita në ditë.
