Nga Julian Myftari
Lexojmë shumë servilë, skllevër, apo të padijshëm të cilët paskan ndjeshmëri për xhamat e bibliotekës që u thyhen. Këta nuk kanë hyrë kurrë aty se po ta kishin futur kokën njëherë, do të kishin kuptuar se atë bibliotekë e ka shkatërruar Erion Veliaj me përmbytje dhe Qeveria me harresë.
Lexojmë se ankohen se po shkatërrohen rrugët nga protestuesit. Këta nuk kanë ecur kurrë në këtë qytet sepse ndryshe do të kuptonin se qytetin po e shkatërron lavatriçja e parave të pista që sundon Tiranën, e cila rrugët e saj i ka kthyer në vena të bllokuara nga metastazat e betonit.
Madje, lexojmë se ankohen që këto shkatërrime do të paguhen nga taksat tona. Këta të fundit matematikën e kanë marrë me mik se po ta kishin marrë me meritë do të kuptonin se taksat tona janë shkatërruar nga Bashkia që tenderon një pemë 4000 euro dhe Qeveria që bën një rrugë me 20 milion euro për km. Nga qeveria që i paguan koncersionaret me tarifat e Suedisë dhe nevojtarët me standardet e Somalisë. Taksat nuk shkatërrohen dhe aq më pak vidhen nga protestuesit.
Lexojmë se po dhunohen policët. Këta nuk kanë qenë kurrë këtu sepse po të kishin qenë këtu do kishin parë se si policia jonë nga mëngjesi në darkë është kthyer në gjobvënëse e kujtdo dhe për çfarëdo. Veçse jo e halabakëve, të fortëve dhe parellinjve.
Lexojmë se po shkelen ligje. Këta se dinë se ligji është cilësi vetëm e sistemit demokratik, kurse çdo sistem tjetër ndërtohet nga urdhrat e batakçinjve që kanë pushtet (forcë). Asgjë të pamoralshme nuk ka të shkeljen e urdhrave të batakçinjve me pushtet sepse këto nuk kanë asnjë lidhje me ligjin.
Një burrë me shumë mend qe ka filluar historinë e demokracisë moderne (John Locke) shkruante se njerëzit kanë të drejtë ta hedhin me revolucion një qeveri kur ajo vepron kundër interesave të tyre dhe se nuk ka asnjë keqbërës më të poshtër se ai me pushtet.
Kjo qeveri nuk është, as ligji, e as më pak e drejta!
