Bora Rasha, motra e Klodianit, i cili u vra nga një efektiv policie në orët e para të mëngjesit të së martës, ka kërkuar drejtësi dhe zbardhjen e ngjarjes.
Bora, e cila mori pjesë në protestën e thirrur nga qytetarët kundër vrasjes së të riut, tha se pret drejtësi.
“Duan drejtësi, për çfarë u vra vëllai im? Kam ardhur nga Italia, sapo mësova vrasjen e vëllait. Ai kishte dalë për të blerë cigare, diku 20 minuta larg banesës.
Pse policia e qëlloi me dy plumba, një në kokë dhe një afër zemrës? Pse policia nuk qëlloi në ajër dhe më pas mund t´a qëllonte nga këmbët. Vëllain tim e qëlluan me dy plumba, njëri në kokë dhe tjetri afër zemrës.
Duam drejtësi, të zbardhet sa më shpejt ngjarja”, tha Bora Rasha.
Ndërkohë disa qindra qytetarë i janë bashkuar protestës së nisur rreth orës 16:30 para Ministrisë së Brendshme dhe më pas para godinës së Kryeministrisë.
Qytetarët kërkojnë dorëheqjen e Sandër Lleshajt si ministër i Brendshëm, ndërsa e akuzojnë si kriminel.
