Shqipëria dhe Kosova presin çfarë do t’u rezervojnë goglat, në shortin që hidhet prej orës 18:00 në Zyrih të Zvicrës. Bëhet fjalë për kualifikueset e Botërorit Qatar 2022 për zonën europiane. Vazot renditen sipas formës së treguar nga skuadrat në eliminatoret e mëparshme. Pra në vazot e para vendosen skuadrat e mëdha dhe forca vjen e ulet grup pas grupi.
VAZO 1: Belgjika, Franca, Anglia, Portugalia, Spanja, Italia, Kroacia, Danimarka, Gjermania, Holanda.
VAZO 2: Zvicra, Uellsi, Polonia, Suedia, Austria, Ukraina, Serbia, Turqia, Sllovakia dhe Rumania
VAZO 3: Rusia, Hungaria, Irlanda, Çekia, Norvegjia, Irlanda e Veriut, Islanda, Skocia, Greqia dhe Finlanda
VAZO 4: Bosnje Hercegovina, Sllovenia, Mali i Zi, Maqedonia e Veriut, Shqipëria, Bullgaria, Izraeli, Bjellorusia, Gjeorgjia dhe Luksemburgu
VAZO 5: Armenia, Qipro, Ishujt Faroe, Azerbajxhani, Estonia, Kosova, Kazakistani, Lituania, Letonia dhe Andorra
VAZO 6: Malta, Moldavia, Lihtenshtejni, Gjibraltari dhe San Marino
Shqipëria është në vazon e katërt, kurse Kosova në të pestën. Duke qenë se ndodhen në vazo të ndryshme, nuk përjashtohet mundësia që dy ekipet shqiptare të bien në të njëjtin grup. Shorti edhe këtë herë do të ketë përballje të ndaluara, shkruan abcnews.
Për të shmangur trazira prej tensioneve mes vendeve do të jetë e pamundur të shohim një përballje të Kosovës ndaj Serbisë, Rusisë dhe Bosnje Hercegovinës. Rusët nuk mund të luajnë as ndaj Ukrainës për shkak të tensioneve për territor në kufirin mes vendeve.
Këtë sezon janë shtuar edhe dy beteja të tjera, që nuk do lejohen të ndodhin. Armenia dhe Azerbajxhani janë në luftë me njëri-tjetrin dhe është e pamundur të jenë në një grup dhe Spanja e Gjilbratari gjithashtu nuk do të lejohen nga shorti të përballen së bashku.
Fushata eliminatore do të nisë më 24 mars të vitit të ardhshëm dhe do të mbyllet më 16 nëntor, duke e ngjeshur jo pak kalendarin, teksa përpara kemi edhe Kampionatin Europian. Skuadrat do të ndahen në 10 grupe, nga grupi A në grupin J.
Vazo e gjashtë ka vetëm pesë skuadra dhe do të pozicionohen në grupet F deri në J. Si zakonisht do të ketë ndeshje vajtje-ardhje brenda grupeve. Dhjetë ekipet e renditura në vendet e para në grupe sigurojnë direkt kualifikimin në Kupën e Botës 2020 që zhvillohet në Katar, ndërsa vendet e dyta shkojnë në play-off. Me to bashkohen edhe dy ekipet e renditura më mirë në Nations League, për të luftuar për tre vende të tjera në Botëror.
