Ish-deputeti i PD-së Luçiano Boçi deklaroi sot se kryetari i bashkisë së Tiranës Erion Veliaj ndërton 1 shkollë me çmim 3 herë më të lartë se BE.
Në një deklaratë për mediet, Boçi tha se dështimi është e vetmja fjalë që mund të përshkruajë qeverinë.
“Sot, thuajse një vit nga dita e tërmetit të 26 nëntorit, 13 mijë nxënës të Tiranës nuk mund të mësojnë në kushte normale, sepse shkollat e tyre janë të dëmtuara. Me përkeqësimin e gjendjes së pandemisë, situata është edhe më kritike, pasi fëmijët e vegjël të klasave të para e të dyta, mësojnë me 2-3 e 4 turne dhe e lënë shkollën në orën 8 të darkës. Kjo gjendje amullie dhe kaosi është mundësuar me sponsorizimin dhe nën kujdesin e posaçëm të Bashkisë Tiranë që do t’u mundësojë gllabërimin e fondeve dhe ndërtimin me çmimin më të lartë, duke shkelur me dhjetëra herë ligjin e prokurimit publik”, tha ai.
Po ashtu, Boçi shton se dy herë u anulua tenderi për ndërtimin e shkollave në Tiranë nga Erion Veliaj, megjithëse ai dhe Edi Rama premtuan se shkollat do të ishin gati në shtator.
“Për të ndërtuar 14 objekte arsimore, Erion Veliaj tenderoi 30 milionë euro. Thënë ndryshe, me procedurën korruptive të Bashkisë së Tiranës, një shkollë apo një kopsht do të kushtojë 2.1 milion euro. Një çmim 3 herë më i lartë se procedura e ndjekur nga Bashkimi Europian për të njëjtën punë. Bashkimi Europian do të ndërtojë 22 shkolla me 15 milionë euro, ndërsa Erion Veliaj dhe Edi Rama do të ndërtojnë më pak, 14 shkolla me 30 milionë euro. Duke ndjekur të njëjtin model vjedhjeje si me rrugët dhe investime të tjera publike, edhe në rastin e shkollave po na vjedhin trefish”, theksoi Boçi.
