Javën e kaluar kreu i Kuvendit, Gramoz Ruçi, iu drejtua me një shkresë Komitetit Teknik të ekspertëve, nëse masat e miratuara për parandalimin e koronavirusit lejonin mbledhjen ose jo të Parlamentit.
Komiteti i ktheu përgjigje se Parlamenti mund të funksiononte nën masa rigoroze, çka bëri që Ruçi të thërriste seancën e rradhës.
Por duket se e gjithë kjo situatë me masa dhe ndalime, ka shtuar gallatën me Parlamentin e Komisionet Parlamentare.
Sot është zhvilluar mbledhja e Komisionit të Sigurisë, një prej Komisioneve më të rëndësishme në një Parlament, por që fatkeqësisht në Shqipëri, qoftë nga përbërja ashtu edhe nga mënyra si funksionon e ka kthyer në qesharak.
Komisioni diskutoi mbi ligjin për mbajtjen e armëve, që në një vend normal, kurrsesi nuk do të merrej në shqyrtim me mënyrën sesi ata parlamentarë vendosën se kush duhet të mbajë armën, se çfarë konsiderohet armë apo deri në çfarë moshe mund të mbash armë.
Xhemal Qefalia, deputeti i PS, ka zgjedhur që të jetë pjesëmarrës në mbledhje nga makina e tij, madje edhe duke preferuar që të vijojë udhëtimin.
Myslym Murrizi shfaqet i shqetësuar për shëndetin e Ermonela Felajt, e cila duket se ka kaluar koronavirusin. E gjitha kjo ka ndodhur në një mbledhje të Komisionit të Sigurisë, aty ku anëtarët pajisen me certifikata sigurie, dhe ku para tyre raportojnë drejtues të shërbimeve sekrete, policisë dhe çdo institucioni tjetër që lidhet me sigurinë e vendit.
Batutat:
Xhemal Qefalia nga makina: Unë do të kërkoja rishikimin e kufirit të moshës 70 vjeç..
Myslim Murrizi: E drejta e Zotit i lejon 70-vjeçarëve të martohen dhe ne t’i heqim atë të mbajtjes së një dyfeku në krah…?
Murrizi: Duhet rishikuar kjo pjesa e përcaktimit si armë të dorezave dhe thikave se dalim te historia çadra pistoletë, stilolapsa pistoletë
Felaj: Z. Derivishaj ose z. Llamallari…
Murrizi: Avash-avash kryetare se je në ditët e para të rikuperimit dhe mos mu lodh shumë.
Felaj: Jo nuk lodhem.
Murrizi: A të keqen kryetare.
Felaj: Kur jam në mbledhje me ju çlodhem.
Murrizi: Mezi e ke kaluar Covidin, duam të jesh marshallah.
Felaj: Ashtu jam.
Murrizi: Lëri të lodhen këta të Ministrisë.
