Një ngjarja e pazakontë ka ndodhur në Itali, ku një 48-vjeçar ka bërë rreth 450 kilometra rrugë në këmbë, pas sherrit që pati me gruan e tij. Mediat italiane raportojnë se burri filloi të ecte në këmbë në Como, por përfundoi në Fano.
Ai u gjet në orën dy të mëngjesit të kësaj të Mërkure nga disa policë që po kryenin kontrolle rrugore për t’u siguruar që respektohen masat anti-Covid.
48-vjeçari, i cili po ecte rrugës, u dërgua në stacionin e policisë, ku u zbulua se kishte humbur kontaktin me familjarët prej një jave.
Pavarësisht ‘hallit’ që kishte, burri u gjobit nga policia për shkelje të rregullave anti-Covid.
Siç raportohet, kur policët e ndaluan atë në Gimarra (Fano), 48-vjeçari, banues në provincën e Como, ishte i kthjellët dhe i mirë-orientuar, por i lodhur dhe kishte ftohtë. Sapo mbërriti në stacionin e policisë, ai tregoi për “aventurën” e tij.
“Unë eca deri këtu, deklaroi burri, unë nuk përdora asnjë mjet. Në këto ditë hëngra dhe piva sepse njerëzit që takova gjatë rrugës më ofruan ujë dhe ushqim. Jam mirë. pak i lodhur“.
Ndërsa burri ishte duke udhëtuar në këmbë, gruaja e tij e kishte raportuar në polici si të zhdukur. Pasi u lajmërua nga policia, shkoi në Fano për të marrë burrin e saj.
