Diego Armando Maradona ishte një futbollist i vlerësuar në të gjithë botën, por ndoshta në Angli më pak se kudo tjetër, nisur nga goli me dorë në çerekfinalen e Botërorit “Meksikë 1986” apo edhe golit të shekullit, ku dribloi thuajse gjithë skuadrwn angleze.
Madje, disa media ishullore ishin dakord me deklaratën e bërë nga ish-portieri i asaj epoke, Peter Shilton, që pretendonte pas në vite faljet e “Pibe D’Oros”, por që ato nuk erdhën kurrë, diçka e përsëritur edhe pas vdekjes së argjentinasit.
Por një ish-futbollist i kombëtares angleze, që gjithashtu ka shkruar epokën e tij, si Pol Gaskoin, i ka dalë kundër bashkatdhetarit të tij, lidhur me deklaratën e fundit, madje më shumë sesa një kundërsulm është një goditje poshtë brezit.
“Maradona ishte një ikonë dhe pikë. Të gjithë kthehen gjithmonë tek ajo ‘Dorë e Zotit’, por vetëm falë atij goli të Diegos, Shiltoni u bë i njohur.
Prandaj ‘Shilti’, falëndero Maradonën që të shënoi atë gol në atë Botëror, ndryshe nuk do të të kishte njohur askush në histori”, ishte deklarata bombastike e “Gaxa” Gaskoinit. Ndërkohë, nuk mungoi kundërpërgjigjja nga ana e ish-portierit anglez Shilton: “Faleminderit ‘Gaxa’, ndonëse unë pas atij goli luajta edhe për 20 vite të tjera, mos e harro këtë.”
