Këshilli i Qarkut në Kukës, i hoqi sot titullin “Nderi i Qarkut Kukës” shkrimtarit dhe publicistit, Veton Surroi.
Ky titull i është dhënë Surroit po nga Këshilli i Qarkut në vitin 2015, me motivin “Për kontribut të veçantë në fushën mediale dhe politike gjatë krizës së vitit 1999 dhe shpalljes së Pavarësisë së Kosovës”.
Pro heqjes të titullit ishte edhe kryebashkiaku i Kukësit, Safet Gjici, njëkohësisht anëtar i Këshillit të Qarkut, sipas të cilit ky vendim është mëse i arsyeshëm për shkak të fushatës mediatike dhe politike që Veton Surroi po bën kundër Ushtrisë Çlirimtare të Kosovës.
Por, Kryeministri Edi Rama në një reagim të tij e konsideron një veprim absurd, teksa shprehet se Parlamenti duhet të ndërhyjë për ta normuar njëherë e mirë çështjen e titujve e të medaljeve.
Nuk dihet nëse realisht anëtarët e Këshillit të Qarkut në Kukës, që i përkasin tërësisht Rilindjes, morën një vendim të pakonsultuar më parë, apo Kryeministri shfaqet si një babaxhan, që po tenton të rregullojë atë që e konsideron si lajthitje.
Reagimi nga Rama
Vendimi i Këshillit të Qarkut të Kukësit për heqjen e titullit “Qytetar Nderi” Veton Surroit është një lajthitje kolektive që uroj Prefekti do ta refuzojë! Ndërkohë parlamenti duhet të ndërhyjë për ta normuar njëherë e mirë çështjen e titujve e të medaljeve.
Ky vend s’mund të jetë një planet më vete brenda botës që e ka sistemuar me kohë e me vakt këtë punë, ku s’ka president që jep medalje për heronjtë e luftërave të shkuara se kështu i thotë koka dhe s’ka këshill që ia heq titullin dikujt me kërkesë të disave! Boll me këtë absurd!
