Nga Boldnews.al
Që Ministres së Mbrojtjes Olta Xhaçka i pëlqen të qëndrojë gjatë në ajër me helikopter kjo nuk është një gjë e re, sepse shpesh është parë që nga bordi i Cougar-it të preferuar të zbresë plot pompozitet, por udhëtimet për fushatë elektorale me itinerarin Tiranë-Dibër, janë mëse të tepërta.
Partia Demokratike denoncoi me pamje rastin kur Xhaçka zbret nga një helikopter i ushtrisë pranë një reparti të lodhur ushtarak në Dibër. U deshën disa ditë që ministria të reagonte zyrtarisht dhe dje ka ardhur një përgjigje, e cila në vend të sqaronte të vërtetën, e ngatërron edhe më shumë, duke mos e mohuar udhëtimin, por “justifikuar” se Xhaçka është në krye të detyrës dhe asaj i duhet të lëvizë për të ndjekur stërvitjet ushtarake, operacionet dhe taktikat e Forcave të Armatosura.
Këtu mund të përfshihet edhe “lufta” trup më trup, mbijetesa në pyjet e dendura, apo aksionet e sulmeve të natës mes kafshëve të egra… dhe në mungesë të aksioneve me adrenalinë, “lufte” edhe loja e kaladrançe mund të hyjë në punë me rekrutët e rinj…
“Duam t’i sqarojmë po ashtu qytetarët që jo vetëm Ministri, por edhe drejtuesit e FA kanë të drejtë, bazuar në ligj e procedura të mirëpërcaktuara, që të përdorin në përmbushje të detyrave funksionale mjetet e FA, përfshirë helikopterët”- thuhet në njoftim. Sipas reagimit zyrtar, në bazë të një plani lëvizjesh, helikopterët e FA, përdoren në mënyrë të rregullt, çdo ditë, për një sërë funksionesh, siç janë stërvitjet, evakuimet, monitorimet, inspektimet, emergjencat ajrore, udhëtimet e transporti për nevoja të FA etj.
Më tej ata justifikohen se një udhëtim me helikopter nuk kushton 10 mijë euro, por më pak. Në fakt, më shumë se shifra e udhëtimeve me hekikopter pa arsye shtetërore, por mirëfilltas politike për fushatë në Dibrën e dosjes 184, është e ngjashme si ajo e “furgonëve me çuna problematik” që mbushte kolegu i saj në qeveri Damian Gjiknuri për zgjedhjet lokale të vitit 2016.
Megjithatë sot nuk është një ushtri e madhe e shpërndarë në çdo cep të vendit që kërkon edhe “inspektime të bëfasishme” të ministres së Mbrojtjes. Kemi një ushtri të vogël me pagesë (por të keqpaguar) e cila është e vendosur në disa zona, por jo e shpërndarë në reparte ku ministrja zbriti me helikopterin e ushtrisë, që për fat të keq e ka kthyer në një mjet ajror “privat”.
Dhe nuk është hera e parë. Në verën e këtij viti, kur me mijëra emigrantë shqiptarë u bllokuan në kufi me greqinë, për të parë situatën nga afër shkoi “shpëtimtarja” Xhaçka. Zbriti nga helikopteri si “Hyj”, por pasi qëndroi jo më shumë se dy orë në kufi, e pa të arsyeshme që të shëllehej ca orë të mira në bregdetin e Jugut. Pikërisht të nesërmen në atë aks rrugor të kthyer në mjarimin kilometric humbi jetën edhe një fëmijë 9-vjeçar, pasi u shtyp nga një autoambulancë du kritur për të kaluar në shtetin fqinj.
Përdorimi i mjeteve shtetërore në fushatë elektorale është i ndaluar edhe me ligj, ndërsa kur vjen rasti për helikopterët që ngrihen në fluturim ka një protokoll të rreptë, ku shërbimi i tyre bëhet vetëm në rast të stërvitjeve që monitorohen nga strukturat e NATO-s, apo edhe në raste të fatkeqësive natyrore.
Në Dibër një javë më parë nuk ndodhej asnjë mision i NATO-s, e aq më pak të kishte ndonjë rast fatkeqësie si emergjencë civile, e vetmja “emërgjencë” ishte se ministrja nuk mund të udhëtonte gjatë me makinë e të shkundej rrugëve me gropa, por i nevojitej një mjet fluturues, të cilin e ka kthyer si “monopatinat” që përdorin një pjesë e administratës së Rilindjes.
