Kryeministri Edi Rama ka reaguar ashpër ndaj akuzave të kreut demokrat, Lulzim Basha, lidhur me fshehjen e numrit të vdekjeve nga Covid-19. Basha iu referuar një dokumenti nga morgu, duke pretenduar se numri i vdekjeve nga Covid është rreth 2 herë më i lartë se ai që raportohet në buletinet ditore të Ministrisë së Shënddetësisë.
“Për akuzën e pashembullt të Lulëzim Bashës, e cila cënon drejtëpërdrejtë integritetin moral e profesional të mjekëve të vijës së zjarrit dhe nxit dhunë ndaj tyre, do t’u drejtohem nesër shqiptarëve me një mesazh të drejtëpërdrejtë, sepse këtu është shkuar shumë shumë larg, përtej çdo caku të politikës së ulët ditore dhe këtu nuk është më fjala thjeshtë për llafet e një aktori të papërgjegjshëm!”, shprehet Rama në një reagim.
Në viji ai u shpreh të gjithë solidaritetin dhe mbështetjen e tij, profesoreshë Najada Çomos e të gjithë skuadrës së saj shembullore, duke u përulur me mirënjohje përpara stërmundimit të tyre të përditshëm prej nëntë muajsh me radhë.
“Historia e mjekësisë shqiptare do të flasë për ta kur Lulëzim Bashës e xhagajdurëve të tjerë të botës mizerabël të shpifjeve e të thashethemeve, t’u jetë harruar emri, nami e nishani!”, thekson Rama.
Reagimi i fortë i Kryeministrit u parapri nga një deklaratë e mjekëve të spitalit Infektiv, që e konsideronin të pabazë akuzën e Kreut të PD. Nuk dihet sepse mjekët e Infektivit reaguan, kur në fakt kreu demokrat nuk artikuloi akuza në drejtim të tyre.
