Përhapja e COVID-19 ka detyruar autoritetet turke që të aplikojnë masa të reja për ta ulur numrin e infektimeve.
Ministria e Brendshme e Turqisë informoi se do të ketë kufizime në funksionimit e restoranteve dhe kafeneve dhe zbatimin e një izolimi të pjesshëm gjatë fundjavës.
Sipas deklaratës, restorantet, kafenetë, qendrat tregtare dhe sallonet e flokëve do të jenë në gjendje të punojnë nga 7.00 në 17.00, ndërsa në restorante do të lejohen vetëm shërbimi “take away” (merre me vete).
Gjithashtu, kinematë do të mbyllen deri në fund të vitit, ndërsa shkollat fillore do të kalojnë në mësimin në distancë.
“Ne po përballemi me një situatë serioze. Numri i rasteve dhe vdekjeve kanë arritur një nivel serioz, duke filluar me Stambollin, kështu që ne duhet të jemi më të kujdesshëm”, u shpreh presidenti i Turqisë, Rexhep Taip Erdogan.
Deri më tani janë regjistruar 11.704 vdekje nga koronavirusi në Turqi.
Por nisur nga fakti se Turqia ka 83 milionë banorë , Organizata Botërore e Shëndetësisë ka vlerësuar Ankaranë për përgjigjen e saj ndaj pandemisë.
