Olga dhe Vincenzo të martuar prej 63-vjetësh, kanë ndërruar jetë në të njëjtën ditë, po në të njëjtin spital. Ata ishin të shtruar në spitalin San Gerardo di Monza, më 11 nëntor, pasi u infektuan me koronavirus.
Olga dhe Vincenzo Molino jetonin në një apartament në Sesto San Giovanni, Milano, dhe u ndanë nga kjo jetë, me një orë diferencë larg nga njëri-tjetri. Gjithë jetën e tyre e kaluan bashkë. Më 26 shtator, festuan 63-vjetorin e martesës.
Nipërit tregojnë se ishin shumë të kujdesshëm, nuk dilnin për xhiro dhe as nuk takonin njerëz. Vetëm gjyshi i tyre, shkonte në farmaci, por virusi i preku gjithsesi.
Ata nuk ishin në të njëjtën dhomë në spital, por Olga, gjendja e së cilës ishte më pak e rëndë, kishte kërkuar që të lejohej të mbante xhaketën e burrit të saj në dhomë, për ta ndjerë atë afër. Këto katër ditë, ishin të vetmet që kishin kaluar larg-njëri tjetrit.
