Gjykata e Tiranës ka pushuar akuzën për 4 nga 6 akuzuarit e çështjes së njohur si “Toyota Yaris”.
Në gjykim është dërguar vetëm Ervis Vladi për akuzën e “mosdeklarimit të të hollave në kufi” dhe Agim Çeka për “armëmbajtje pa leje”.
Për të dyshuarit e tjerë, Alfred Vladi, Edi Lika, Klevi Cani dhe Alban Mollaymeri është pushuar akuza e ngritur nga prokuroria për mosdeklarim të të ardhurave në kufi.
Hetimet për çështjen nisën pasi në Qershor të vitit 2018, në Portin e Durrësit u gjetën rreth 3.4 mln eruo të padeklaruara në dy makina të tipit “Toyota Yaris”, si dhe një sasi frangash zvicerane. Prokuroria akuzoi 6 persona lidhur me ngjarjen, ndërsa gjykata tanimë ka vendosur që vetëm dy prej tyre të jenë në bankën e të akuzuarve.
Çështja u bë dhe politike, pasi para se të vinte sekuestro e shumës së parave, nga foltorja e Kuvendit, Lulzim Basha paralajmëroi ngjarjen, duke deklaruar se para të krimit po pastroheshin në Shqipëri, me bekimin e mazhorancës.
Ndërkohë, shuma prej rreth 3.4 milionë euro do të vazhdojë të jetë e sekuestruar për llogari të SPAK-ut, që po heton ligjshmërinë e kësaj vlere monetare, sipas ligjit antimafia.
