Prej disa ditësh, Ministria e Shëndetësisë, raporton edhe testimet që kryen në privat, ndërsa shifrat e raportuara të testimeve kanë kaluar 2000 në ditë.
Gjatë debatit në Opinion lidhur me testimet, ishte e pranishme edhe Silva Bino, shefja e Epidemiologjisë në ISHP, e cila tha se testimet po kryhen rast pas rasti, duke gjurmuar kontaktet e personave të infektuar.
Bino sqaroi se pas 10 ditësh nuk ka më nevojë për testime, duke pranuar se ka abuzime. “Pas 10 ditësh, kur kalojnë edhe simptomat e temperaturës dhe simptomat e tjera, nuk ka nevojë për testime negativizimi”, tha Bino.
Lidhur me raportimin e testimeve nga privatët, gjatë debatit në studio, Binos iu tha se këtu ka një hile.
“Po deklarohen edhe tamponët që bëhen në privat sepse kaluan shifrat, kaluan përqindjet, dhe për të ulur përqindjen, po raportohen edhe testet e privatëve. Këtu ka një hile”, i tha një nga të pranishmit në studion e Opinion, Silva Binos.
Gjithashtu, Bino u detyrua të pranojë se në rastet kur një nga pjesëtarët e familjes rezulton pozitiv, pjesëtarët e tjerë nuk i nënshtrohen testimeve.
“Po nuk i nënshtrohen, kemi kaluar në transmetim komunitar”, tha Bino, duke shtuar se nuk është e detyrueshme që të bëhen tamponë në raste të tilla.
