Mjeku i njohur shqiptar, Kita Sallabanda, i cili punon në një nga spitalet në Spanjë, tha mbrëmjen e sotme në “Opinion” se në Shqipëri po përdoren skema trajtimi për Covid-19 që s´kanë lidhje me kurimin e pacientëve.
Sallabanda tha se ka parë receta të dhëna nga mjekët shqiptarë që ngarkohen me antibiotikë që nuk e luftojnë koronavirusin.
“Po shtohen kostot e pacientëve, po bëhen mjekime agresive. Paracetamoli, vitamina C dhe D, përdoren në fazën e parë, më pas në një fazë tjetër, mund të përfshihen edhe mjekime të tjera, në varësi të situatës së pacientit. Por e konsideroj të tepërt, madje bombarduese për pacientët, përdorimi i antibiotikëve që në fillim”, tha Sallabanda.
Sipas tij, në Spanjë ka një kufizim të lëvizjeve pas orës 22:00, ka një reduktim me 50 % të ambienteve të brendshme në bare dhe restorante, ndërkohë që ai që do të pijë një kafe, mund t´a konsumojë në ambientet e jashtme.
