Zgjedhjet presidenciale në Shtetet e Bashkuara do të hetohen. Vendimi është marrë nga Prokurori i Përgjithshëm William Barr, i cili ka autorizuar prokurorët federalë.
Sipas tij, ata duhet të hetojnë ato që ai i quan “pretendime të forta” për parregullsi, gjatë zgjedhjeve të 3 nëntorit.
Në fakt nuk citohet ndonjë rast konkret ku ka dyshime për manipulime, por Donald Trump e ka artikuluar shpesh këtë pretendim.
Zoti Barr shkruante se hetimet “mund të kryhen nëse ka pretendime të qarta e të besueshme për parregullsi, të cilat nëse janë të vërteta, mund të ndikojnë në rezultatin e zgjedhjeve në një shtet të caktuar”.
Ai shtonte se “ndërsa është e domosdoshme që pretendimet e besueshme të trajtohen në një kohë dhe në mënyrë efektive, është po aq e domosdoshme që personeli i Departamentit të tregojë kujdesin e duhur, e të ruajë angazhimin absolut të këtij Departamenti, për drejtësi, paanësi e qasje jopartiake”.
