Autoritetet në Danimarkë, por edhe Organizata Botërore e Shëndetësisë, kanë ngritur alarmin për mutacionin e koronavirusit që po përhapet edhe nga kafsha vizon.
Në një konferencë shtypi të mërkurën, Kryeministri danez, Mette Frederiksen, tha se 12 persona janë infektuar tashmë me virusin mutacion dhe se kafsha tani konsiderohet si një rrezik i shëndetit publik.
“Virusi me mutacion në vizon mund të përbëjë rrezik për efektivitetin e një vaksine të ardhshme”, tha Frederiksen.
Janë mbi 15 milionë kafshë të tilla në të gjithë Danimarkën të cilat do të vriten.
“Ne jemi në dijeni të raporteve nga Danimarka për një numër njerëzish të infektuar me koronavirus nga vizoni, me disa modifikime gjenetike në virus. Ne jemi në kontakt me autoritetet daneze për të zbuluar më shumë,” tha OBSH në një postim në Twitter.
Danimarka është prodhuesi më i madh në botë i gëzofit të vizonit dhe ka 15 deri në 17 milionë kafshë në rreth 1 mijë e 100 ferma.
