Është luajtur ditën e sotme java e parë e Kategorisë Superiore. Takimet janë luajtur në dy fasha oraresh të ndryshme, teksa tre sfida janë zhvilluar në orën 13:45, ndërsa raundi i parë është mbyllur me dy takime të orës 16:45.
Tirana e nisi sezonin me një fitore të pastër 2-0 ndaj rivalëve të Kukësit. Për kampionët në fuqi heroi i takimit ishte Najdovski i cili realizoi një dopietë. Një fillim i mbarë për bardheblutë, ndërsa e kundërta vlen për ekipin verilindor të cilët gjejnë humbjen që në startin e kampionatit.
Rezultati surprizë i javës së parë, mund të konsiderohet humbja e Partizanit ndaj Kastriotit. Ekipi krutan zhvilloi një takim tepër pozitiv dhe në fund u shpërblyen me një fitore 2-1.
Për vendasit shënuan Devid dhe Rezi, ndërkohë për të kuqtë barazoi përkohësisht rezultatin, Jasir Asani me anë të një 11-metërshi. Takimi tjetër i luajtur në orën 13:45 ishte ai mes Bylisit dhe Laçit, i mbyllur në barazim 1-1.
Ndërkohë java hapëse u mbyll me takimet Teuta-Skënderbeu dhe Vllaznia-Apolonia. Ekipi shkodran arriti një fitore të pastër 2-0 ndaj fierekëve, ndërkohë ndeshja e luajtur në “Niko Dovana” nuk prodhoi fitues, teksa durrsakët dhe korçarët u ndanë në një barazim 1-1.
Rezultatet e javës së parë në Kategorinë Superiore:
Ora 13:45
Bylis-Laçi 1 – 1
Kastrioti-Partizani 2 – 1
KF Tirana-Kukësi 2 – 0
Ora 16:45
Teuta-Skenderbeu 1 – 1
Vllaznia- Apolonia Fier 2 – 0
