A do të zgjidhet Presidenti i ri i SHBA përmes një procesi gjyqësor? Stafet elektorale të Donald Trump dhe Joe Biden kanë deklaruar se janë të gatshme t’i drejtohen Gjykatës dhe të ndjekin rrugët ligjore.
Reagimet kanë ardhur pasi Presidenti Donald Trump ka hedhur dyshime mbi manipulimin e votave në ato që konsiderohen si shtetet kyçe.
“Rezultatet sonte kanë qenë fenomenale. Ne do ta fitojmë këtë. Për aq sa di, ne veçse kemi fituar”, ka deklaruar Trump nga Shtëpia e Bardhë.
Megjithatë ai ka thënë se planifikon t’i drejtohet Gjykatës Supreme për të ndaluar numërimin. Ai ka thënë se zgjedhjet “janë duke u manipuluar“, por nuk ka thënë se cilat janë arsyet që e shtyjnë ta bëjë këtë.
Stafi i kandidatit demokrat për President të Shteteve të Bashkuara, Joe Biden, ka thënë se do të luftojë çdo përpjekje të Presidentit amerikan, Donald Trump, për të shkuar në Gjykatën Supreme për të ndalur numërimin e votave, transmeton AP.
Menaxherja e fushës së Biden, Jen O’Malley Dillon, i ka cilësuar “të pashembullta” dhe ”jokorrekte” deklaratat e Trumpit se do të shkojë në Gjykatën Surpeme dhe do të kërkojë “të ndalet gjithë votimi”.
O’Malley Dillon ka thënë se Biden ka ekipe ligjore që janë të gatshme të angazhohen dhe t’u rezistojnë këtyre përpjekjeve. Ajo ka thënë se këto ekipe “do të triumfojnë”.
Në disa shtete amerikane ende janë qindra mijëra vota të panumëruara dhe rezultati përfundimtar varet nga një pjesë e shteteve kyçe që nuk i kanë shpallur ende rezultatet.
Për të fituar, një kandidati i duhen 270 vota elektorale.
