Teksa në vendin tonë prej 15 tetorit ka hyrë në fuqi vendimi për mbajtjen e maskës me detyrim në ambientet jashtë shtëpisë dhe në vende publike, del udhëzimi se si do të paguhet gjoba për ata që nuk respektojnë masën.
Udhëzimi në fjalë është publikuar në Fletoren zyrtare, ku përcaktohet e gjithë procedura që ndiqet në të gjitha etapat, që nga vendosja e gjobës, deri tek rastet kur qytetari refuzon që ta paguajë gjobën.
Në rastet më ekstreme, nëse qytetari nuk e paguan gjobën që vjen bashkangjitur tek fatura e dritave, atij do t’i ndërpritet energjia elektrike.
Mbetet ende e paqartë se si do paguhet gjoba nga individët të cilët s’kanëkontrata me OSHEE.
UDHËZIMI
E paqartë, si do paguhet gjoba nga individët pa kontrata me OSHEE
Në udhëzim që mban firmën e ministreve të Shëndetësisë, Financave, e Energjitikës, është e paqartë se si do të paguhen detyrimet nga persona të cilët nuk kanë nuk kanë kontrata me OSHEE, apo kryefamiljari i tyre s’ka kontrata me Operatorin e Shpërndarjes së Energjisë Elektrike.
Në udhëzim shpjegohet se, Policia e Shtetit apo Policia Bashkiake dërgon brenda 14 ditëve procesverbalin e vendosjes së gjobës në Furnizuesin e Shërbimit Universal(FSHU) sh.a. Operatori i Shpërndarjes së Energjisë Elektrike GROUP (OSHEE) sh.a. Ky procesverbal, në çdo rast, duhet të përmbajë minimalisht informacionin në lidhje me emrin, mbiemrin, atësinë, numrin e kartës së identifikimit, si dhe adresën e banimit të individit. FSHU-ja, për rastet kur individët kanë kontratë furnizimi energjie, do të regjistrojë gjobën në faturën e energjisë elektrike të muajit respektiv.
Kur FSHU-ja konstaton se individi nuk ka kontratë furnizimi të energjisë elektrike ose të dhënat e pasqyruara në gjobë nuk janë të plota apo nuk korrespondojnë me të dhënat në Sistemin e faturimit të FSHU/OSHEE, i kthen procesverbalin e gjobës, sipas rastit, Policisë së Shtetit ose Policisë Bashkiake.
Mospagesa sjell kamatë, deri në ndërprerjen e energjisë elektrike
Më tej në udhëzim, sqarohet se, gjoba, e përfshirë në faturën e energjisë elektrike, do të jetë titull ekzekutiv dhe nuk do të mund të paguhet pjesërisht apo e shkëputur nga fatura e energjisë elektrike.
Pagesa jashtë afateve do të shoqërohet me kamatëvonesat përkatëse në përputhje me kontratën e energjisë elektrike të miratuar nga Enti Rregullator i Energjisë. Mospagesa e gjobës, si pjesë përbërëse e faturës, do ta klasifikojë individin si debitor ndaj FSHU-së dhe kontrata përkatëse e energjisë elektrike do të dërgohet për ndërprerje të furnizimit me energji elektrike, sipas afateve dhe procedurave të përcaktuara nga Enti Rregullator i Energjisë.
Pagesat mund të bëhen pranë te gjitha zyrave përkatëse të përcaktuara nga FSHU-ja, pranë Postës Shqiptare dhe pranë çdo institucioni financiar ku paguhet fatura e energjisë elektrike.
LEXO EDHE:
VIDEO/ U kapën pa maska, gjobiten 468 qytetarë. Ndëshkohen edhe 20 pronarë lokalesh
