Mjeku Renato Osmenaj, i njohur në rrjete sociale si “Xhaxhi doktori” ka publikuar fotografinë e ilacit Remdesivir që prej fillimit të pandemisë tregoi se ka efikasitet tek pacientët e prekur nga koronavirusi.
Imazhin e ka shoqëruar me çmimin duke thënë se kushtojnë 3000 euro vetëm 6 flakonë ndërsa ngriti pyetjen për Komitetin nëse ka gjendje në tre spitalet Covid në vendin tonë.
“Rubrika ‘Sqarojmë komitetin’ 3000 euro 6 flakonë! Sapo e bleu një miku im. Ka komiteti si ky ilaçi në spitale?”, shkroi Osmenaj.
Remdesivir i përket një klase të ilaçeve të njohura si “zëvendësim i nukleozidit” të cilat përdoren gjerësisht në trajtimin e kancereve, viruseve dhe infeksioneve të ndryshme.
Ende janë duke u bërë prova për efektivitetin e Remdesivirit në trajtimin e pacientëve me COVID-19, por ka shenja shpresëdhënëse se ilaçi është i dobishëm në trajtimin e sëmundjes, veçanërisht te pacientët në gjendje kritike.
Një ditë më parë, publikoi recetën që i jepet nëpërmjet aplikacionit “WhatsApp” një pacienteje që nuk ka shenja të sëmundjes së Covidit, por është asimptomatike.
“Recefin në venë, Levofloxacin në venë, Enoxapirin nën lëkurë, dexametazon ampulë, vitaminë C, Vitaminë D dhe Zinc”, janë ilacet që sugjerohen nga një mjek i spitalit “Shefqet Ndroqi”, i njohur ndryshe si Covid. Ajo që është për tu shqetësuar është se pacientët asimptomatikë marrin receta me injeksione për tu kuruar nga Covidi.
Ndërkohë mbetet ende e paqartë se me çfarë ilaçesh kurohen pacientët në spitalet e vendit tonë.
