Studentët janë duke protestuar sot në 3 pika të ndryshme të kryeqytetit, një pjesë te kryeministria, një pjesë te Ministria e Arsimit dhe një pjesë tjetër pranë Ministrisë së Shëndetësisë, pasi kundërshtojnë vendimin e dhënë nga qeveria që mësimi të jetë tërësisht online.
Një përfaqësi e studentëve kanë hyrë në ambientet e Ministrisë së Shëndetësisë, ku kanë dorëzuar një listë me kërkesa, ku kryesorja mbetet ajo e marrjes së mësimit të alternuar, online dhe fizikisht.
Kërkesat e depozituara me shkrim nga ana e studentëve:
Mësimi i alternuar mes online dhe auditoreve, leksionet online, seminaret në auditore.
Rimbursimi i pagesës së konvikteve dhe qerave
Paketat e internetit falas dhe të dedikuara për studentët
Mundësim i paisjeve teknologjike të nevojshme për studentët që nuk kanë akses në mësimin online
Duhet thënë se pjesëmarrja e studentëve ka qenë e madhe në protestën e sotme, ku nuk kanë munguar brohoritjet, por edhe pankartat e shumta që mbajnë në duar të pranishmit. Studentët shprehen se është e papranueshme që mësimi të jetë online, në një kohë që partitë politike vijojnë të pashqetësuar takimet e tyre elektorale dhe kafet janë të mbushura plot.
Të rinjtë shprehen se një pjesë e mirë e tyre e ka provuar vitin e kaluar mësimin online, dhe është vënë re se ai nuk ka qenë efikas, aq më shumë se disa prej lëndëve kërkojnë punë në laboratore. Në këtë kuadër ka pasur dhe pankarta të tilla si: Operacionet nuk mund të bëhen online.
Që në nisje të protestës, Policia bëri thirrje që studentët të shpërndaheshin pasi tubimet janë të paligjshme, por të rinjtë janë të vendosur për të qendruar para Ministrisë, pasi sipas tyre kërkesat janë tërësisht të ligjshme.
Në masë studentët shprehen se do ta bojkotojnë mësimin online, dhe do të jenë në pritje të një vendimi të dytë, nga ana e Ministrisë së Shëndetësisë, që është dhe dikasteri që merr vendimet në situatën e pandemisë që po kalon vendi ynë.
