Petrit Vasili, nënkryetar i LSI, ka ironizuar përmes një postimi në rrjet Komitetin e Ekspertëve që u ngrit për të menaxhuar situatën anti-Covid, duke u shprehur se askush nuk i merr seriozisht.
Vasili shkruan se kur Komiteti i Ekspertëve nuk merr seriozisht veten nuk ka asnjë arsye për të bërë as debat dhe as diskutim me të.
“Nuk kemi pra pse i keqkuptojmë anëtarët e Komitetit, të cilët nuk dinë as emrin e ligjit mbi të cilin është ngritur Komiteti ku këta janë edhe anëtarë.
Kur Deklaratat e Komitetit përgatiten në zyrat e shtypit të Edi Ramës të tilla broçkulla do të shkruhen”, shkruan Vasili.
Reagimi i Vasilit ka ardhur pasi Komiteti Teknik i Ekspertëve për pandeminë iu përgjigj deklaratave të kreut demokrat, Lulzim Basha, sipas të cilit sistemi shëndetësor po shkon drejt kolapsit.
Në reagim thuhet se ky komitet është përballur me sulme dhe fyerje të vazhdueshme, mes të cilave edhe nga kreu demokrat. Për këtë arsye Komiteti Teknik i Ekspertëve i kërkon Bashës të tërheqë akuzat e bëra.
“Me keqardhje dhe indinjatë të thellë, dëgjuam akuzat e bëra ndaj nesh nga ana e Kryetarit të Partisë Demokratike, Z. Lulzim Basha. U bë kohë që përveç përballimit të një situate shumë të vështirë, siç është ajo e pandemisë së Covid-19, jemi gjendur të sulmuar dhe të fyer në punën tonë, duke filluar nga kryetari i PD dhe disa pak politikanë të tjerë. Ne, anëtarët e Komitetit Teknik të ekspertëve, jemi profesionistë të fushës sonë dhe sot, jemi pjesë e këtij Komiteti, të ngritur në zbatim të Ligjit mbi Epidemitë, për t’i shërbyer qytetarëve shqiptarë në këtë kohë tejet sfiduese. Ne nuk jemi “fasadë” e askujt, siç deklaron Z. Lulzim Basha. Ne nuk pranojmë akuzat për dështim në punën tonë, të bëra nga një kryetar partie, formimi profesional i të cilit nuk ka se si t’ia lejojë të bëjë gjykime në lidhje me punën e këtij komiteti”, thuhet në reagimin e Komitetit.
Postimi nga Petrit Vasili:
Pse deklarata e Komitetit të Ekspertëve nuk duhet marrë shumë seriozisht!!
Kur Komiteti i Ekspertëve nuk merr seriozisht veten nuk ka asnjë arsye për të bërë as debat dhe as diskutim me të.
Në deklaratën e tij Komiteti i Ekspertëve thotë:
“Ne, anëtarët e Komitetit Teknik të ekspertëve, jemi profesionistë të fushës sonë dhe sot, jemi pjesë e këtij Komiteti, të ngritur në zbatim të Ligjit mbi Epidemitë”.
Ligj për Epidemitë në Republikën e Shqipërisë nuk ka.
Ligji mbi të cilin është ngritur ky Komitet është: LIGJI.Nr. 15/2016 “PËR PARANDALIMIN DHE LUFTIMIN E INFEKSIONEVE DHE SËMUNDJEVE INFEKTIVE.”
Nuk kemi pra pse i keqkuptojmë anëtarët e Komitetit, të cilët nuk dinë as emrin e ligjit mbi të cilin është ngritur Komiteti ku këta janë edhe anëtarë.
Kur Deklaratat e Komitetit përgatiten në zyrat e shtypit të Edi Ramës të tilla broçkulla do të shkruhen.
P.S. Shumë “interesant” preokupimi i Komitetit për formimin profesional të Lulzim Bashës, që nuk mundësoka vlerësime për pandeminë.
Rëndësi ka që Komiteti është i ” shumë i lumtur” se formimi profesional prej piktori i Edi Ramës qenka i duhuri për të bërë vlerësime për pandeminë.
Formimi i Edi Ramës është tamam i “duhuri” për të koleksionuar budallëqet e tij publike pa fund, të cilat duhet ta kishin bërë me kohë të paktën Komitetin të skuqej, meqënëse s’ja mbante as t’i thoshte dot Edi Ramës të mbyllte gojën.
