Një i ri shqiptar humbi tragjikisht jetën mbrëmjen e së premtes në Firenze të Italisë. Bëhet fjalë për një 28-vjeçar, i cili gjeti vdekjen teksa udhëtonte me motor. Ngjarja e rëndë ndodhi rreth orës 20:00 të mbrëmjes së shkuar. Sipas mediave italiane, Agron Dajlanaj po kthehej nga puna për në shtëpi, në Prato, ku jetonte prej kohësh. 28-vjeçari udhëtonte me një scooter, kur në rrethana ende të paqarta u përplas me një makinë.
Përplasja ishte tepër e fortë. I riu shqiptar përfundoi disa metra larg, duke gjetur vdekjen në vendin e ngjarjes. Shqiptari ishte i martuar dhe kishte një vajzë të vogël.
Bashkëshortja dhe nëna e tij mësohet se shkuan në vendin e ngjarjes, pasi u njoftuan për aksidentin tragjik. Ato u përballën me skenën e tmerrshme dhe u dërguan në spital për shkak të tronditjes. Për aksidentin e rëndë autoritetet policore kanë nisur hetimet.
