Ish-deputeti Dashamir Shehi, kryetar i LZHK, nuk i sheh si shqetësim partitë e reja që po regjistrohen vetëm pak muaj para zgjedhjeve parlamentare.
Në një prononcim për gazetën “Panorama”, ai u shpreh se beson se ato do të rreshtohen në krah të opozitës para dhe pas zgjedhjeve, në të kundërt ai thotë se karriera e tyre politike përfundon.
“Unë nuk tremben nga këto parti të reja, sepse ka një pjesë të elektoratit që nuk ndihet i përfaqësuar, mund të ketë pakënaqësi me PD-në e me të gjithë dhe këta kanë të drejtë të kenë një alternativën.
E gjithë çështja është se unë besoj se këto do i rreshtohen grupit opozitar, qoftë para dhe qoftë pas zgjedhjeve. Nëse nuk do jenë pjesëtar aktiv të një opozite kundër Ramës, atëherë ata do të vetizolohen dhe nuk do të kenë të ardhme politike”, tha Shehi.
Por nga ana tjetër, Shehi u shpreh se opozita është disi e vonuar për të ndezur motorët, ndaj njësoj si aleatët e tjerë kërkon që formula me të cilën do të përballen me maxhorancën aktuale, të caktohet pa humbur kohë.
“Unë mendoj se duhet që brenda këtyre 10 ditëve duhet të marrim vendimet definitive për formulën se si do të hymë. Me një listë apo me dy, apo me një marrëveshje bashkëpunimi. Por duhet t’i vëmë një kapak kësaj pune, sepse në këtë zhurmë, përfitues është Rama”, vijoi Shehi.
