Kryeministri Edi Rama ka zgjedhur t’i drejtohet me batuta kreut demokrat, Lulzim Basha, i cili një ditë më parë hodhi akuza për terrorizëm shtetëror lidhur me mënyrën se si qeveria po menaxhon pandeminë e Covid-19.
Ndërsa rastet me Covid-19 janë rritur ndjeshëm dhe po kështu edhe numri i pacientëve në spitale, si dhe humbjet e jetëve, Basha i kërkoi Ramës që të shtohen testimet, ndërsa referuar një deklarate nga një prej mjekëve të Durrësit, në qytetin bregdetar janë realizuar 15 tampone nga 60 që ishin kërkuar.
Dhe në vend të problemit real, që ka të bëjë me mungesën e testeve, ku Shqipëria renditet në vendin e fundit me 1 test për 25 banorë, ndërkohë që Bosnja e ka raportin 1 me 11, Rama ka zgjedhur të merret me batuta, të mos i japë një përgjigje direkte dhe të shmangë thelbin.
“Zgjohu Lul zgjohu, zgjohu dreqin zgjohu zgjohu! Zgjohu miku im se s’ka lezet fare kjo farë derexheje kështu… Zgjohu!”, shkruan Rama në rrjet duke postuar videon e mëposhtme.
Një ditë më parë, kreu demokrat Lulzim Basha, tha se ministrja e Shëndetësisë, Ogerta Manastirliu, duhej të dorëhiqej sepse po vdesin njerëzit rrugëve dhe në dyert e spitaleve. Basha tha se është e turpshme ti kërkosh opozitës të mbyllë gojën, ndërsa e cilësoi si kriminale deklaratën në Parlament të ministres Manastirliu.
“Duhej të jepte dorëheqjen, duhet të ikë sepse jemi vendi i fundit në Rajon për tamponët. Çfarë pret Manastirliu, që opozita të mbyllë gojën? Ne mbrojmë interesin publik, ndërsa kjo qeveri po luan me shëndetin e shqiptarëve”, tha Basha.
