Një ngjarje e rëndë ndodhi në galeritë e një miniere në zonën e Selishtës në Dibër, ku humbën jetën tre minatorë.
Kryetari i Konfederatës së Sindikatave, Kol Nikollaj thotë se ngjarja ka ndodhur në një minierë të braktisur dhe jashtë kontrollit të institucioneve.
“I bëjmë apel ndaj qeverisë, politikbërësve, vendimmarrjes, veçanërisht strukturave ligjzbatuese, që edhe në raste të tjera që kanë qenë fatale, kanë qenë jashtë funksionit të tyre”, tha Nikollaj.
Sipas tij, Agjencia Kombëtare e Burimeve Natyrore, Inspektoriati Shtetëror i Punës dhe Agjencia e Kontrollit të Minierave duhet të kenë një hartë të galerive të braktisura dhe një hartë të rrezikut në këto galeri.
“Në bazë të vendimit të qeverisë ato (galeritë) duhet të ishin mbyllur dhe duhet të ishin abandonuar duke i mbyllur grykat e tyre me eksploziv apo duke i betonosur”, tha Nikollaj.
