Është mbyllur raundi i dytë i ndeshjeve, të vlefshme për fazën e grupeve të Ligës së Kampioneve.
Ashtu si një ditë më parë edhe mbrëmjen e sotme janë zhvilluar plot tetë takime. Dy ndeshje u luajtën në orën 18:55, aty ku PSG-ja triumfojë 0-2 në transfertën e Basaksehir, ndërsa Chelsea shkatërroi 0-4 Krasnodar-in.
Kryendeshja e mbrëmjes ishte ajo mes Juventusit dhe Barcelonës, skuadra që bëjnë pjesë në Grupin G. Spanjollët ia dolën të triumfojnë 0-2 në “Allianz Stadium”, teksa përballë kishin një Juventus totalisht pa ide në fushën e lojës. Golat për miqtë u shënuan nga Ousmane Dembele dhe Leo Messi (11-metërsh).
Në të njëjtin grup, Ferencvaros ia doli të marrë pikën e parë, pasi rikuperoi disavantazhin prej dy golash ndaj Dinamos së Kievit, duke bërë që ndeshja të mbyllej në barazim 2-2.
Ndërkohë për të kaluar në Grupin H, pas fitores 1-2 në Paris një javë më parë, Manchester United regjistroi një tjetër sukses sonte në “Old Trafford” pasi mposhti me rezultatin e pastër 5-0 gjermanët e Leipzig, që një vit më parë shkuan deri në gjysmëfinalet e Ligës së Kampionëve.
Në këtë sfidë, Rashford shënoi një tripletë, ndërsa realizuan edhe Greenwood dhe Anthony Martial (11-metërsh).
Në sfidat e tjera, Borussia e Dortmundit mposhti Zenitin me rezultatin 2-0 falë golave të Sancho dhe Haaland, Lazio nuk shkoi përtej barazimit 1-1 në transfertën belge ndaj Club Brugge, ndërsa Sevilla fitoi me rezultatin minimal 1-0 ndaj Renes.
