Aktivistë të Organizatës Politike, janë solidarizuar me naftëtarët e Ballshit, të cilët janë futur në grevë urie për shkak të mosmarrjes së pagave.
Mëngjesin e sotmëm aktivistët e ‘OP’ i janë drejtuar Ministrisë së Infrastrukturës. Ku i kanë mbyllur derën dhe kanë dhënë dhe një mesazh të fortë me mbishkrimin: Naftëtarët në grevë, Ministria hesht:.
Ja postimi i OP:
NAFTËTARËT NË GREVË, MINISTRIA HESHT
Sot në mëngjes një grup aktivistësh të Organizatës Politike kryen një aksion ndërgjegjësues në hyrje të Ministrisë së Infrastrukturës dhe Energjisë. Naftëtarët/et janë në grevë urie prej një muaji, por Edi Rama dhe ministrja e tij Balluku tallen me sakrificat e tyre.
Shqipëria lëngon përditë nga mijëra padrejtësi, por barra mbi kryet e naftëtarëve është e pashoqe. Prej një viti qindra gra e burra janë pa punë, pa paga dhe pa të ardhme. Çfarë kërkojnë janë të drejta jetike që u takojnë me ligj dhe vendim gjykate: pagat e prapambetura dhe rifillim të punës. Ligj e vendim që qeveria e kapur e Edi Ramës nuk ka vullnetin t’i zbatojë.
Ne, aktivistët e Organizatës Politike, kemi qenë, jemi dhe do të qëndrojmë në krah të naftëtarëve. Fitorja e tyre do të jetë një kambanë shprese për të gjithë punëtorët dhe njerëzit e nëpërkëmbur të vendit tonë.
#MeNaftetaret
