Manchester City e ka humbur shkëlqimin e dikurshëm që kishte nën drejtimin e Pep Guardiolës. Formën e dobët të shfaqur gjatë sezonit të kaluar, “Qytetarët” po e tregojnë edhe në edicionin e ri.
Zhgënjimi më i fundit është ai përballët West Ham, sfidë e mbyllur në barazim 1-1. Të besuarit e Pep Guardiolës u ndëshkuan që në minutën e 18’, kur sulmuesi 30-vjeçar anglez Michail Antonio shënoi një gol spektakolar me roveshiatë, pas një krosimi pa shumë pretendime në zonë.
Reagimi i City-t ishte mjaft i mirë dhe pas një shpërthimi të Joao Cancelos në krah, ishte Phil Foden që dërgoi topin në rrjetë duke rikthyer baraspeshën në minutën e 51-të, por më pas rezultati mbeti i pandryshuar deri në vërshëllimën finale.
Në pesë ndeshjet e para të kampionatit, Man. City numëron 8 pikë, shumë pak për një skuadër që aspiron titullin kampion.
