Evropa po e përjeton keq valën e dytë të Covid-19. Dhe një tendencë shqetësuese ka filluar të shfaqet ditët e fundit. Më shumë të moshuar po infektohen.
Gjatë muajve të verës, në këtë kontinent kishte më shumë të rinj të infektuar, pasi ata shkonin në bare, restorante, pishina e party. Megjithëse shifrat e viktimave ishin të ulëta për shkak se kishte të infektuar të rinj, tani kjo situatë po ndryshon.
Qendra Evropiane për Parandalimin dhe Kontrollin e Sëmundjeve (ECDC) ka paralajmëruar se më shumë njerëz të moshuar po infektohen. Të paktën në 13 vende të Evropës, janë rritur nivelet e infeksionit tek ata mbi 65 vjeç.
Shkalla e infeksionit të Covid-19 në këtë moshë në disa vende të Evropës Lindore është dyfish më e lartë se gjatë valës së parë. Shkalla më e lartë e infeksionit te të moshuarit është shqetësuese sepse janë ata që përfundojnë në spital dhe përballen me rrezikun për të vdekur nga virusi.
Sipas Organizatës Botërore të Shëndetësisë, deri në fund të gushtit pothuajse 88% e të gjitha vdekjeve në Evropë ishin mes grupmoshës mbi 65 vjeç.
Kur infeksioni fillon të përhapet mes njerëzve të moshuar, spitalet mund të mbingarkohen, siç ndodhi në Itali, Spanjë dhe vende të tjera gjatë valës së parë të virusit.
