Kryetarja e LSI-së Monika Kryemadhi ka vizituar banorët e Vorës, të cilët janë prekur nga tërmeti i fuqishëm i 26 Nëntorit dhe mësoi cilat janë shqetësimet e tyre. Kishte banorë që ankoheshin se ishin marrë vendime për të dëmtuar godina që nuk kishin pësuar dëme, ndërsa Kryemadhi i premtoi se gjithçka do të marrë fund për “6 muaj e katër ditë” pasi në zgjedhjet e 25 Prillit do vuloset fati i Ramës nga vota e shqiptarëve.
Nuk la pa komentuar Reformën në Drejtësi duke thënë se është shkatërruar nga Rama pasi ka qëllim të emërojë vetëm gjyqtarët që janë të lidhur me të dhe të Sekretarit të Përgjithshëm të Kryeministrit, Ëngjëll Agaçin. Ndërsa shtoi se emërimi i gjyqtarit mund të lidhet edhe me ndonjë ndërkombëtar, por nuk përmendi emër konkret.
“Edi Rama ka shkatërruar Shqipërinë, e ka shpopulluar. Më 25 prill do bashkohemi të gjithë. Unë nuk besoj të reforma në drejtësi se kjo ka ardhur vetëm për të emëruar gjyqtarët që janë të lidhur me Edi Ramën, Engjëll Agaçin dhe me ndonjë shërbëtor të ndonjë ndërkombëtari.
Ti ruaji letrat se do t’i vijë dita drejtësisë dhe për të marrë ata që duhet sepse ata nuk mund t’i bien më në qafë njerëzve. Ruaj letrat se mund të bëjnë edhe ndonjë padi sepse ai nuk mund të të marrë taksën si biznes edhe të të kompensojë si banor. S’mund të na marrë zvarrë një i çmendur.
Sa vjen e iu ngushtohet laku edhe 6 muaj iu kanë ngelur. Si nuk u ngop ky, detin po, pronat po, çdo gjë. Rama do të grabisë Kushtetutën, por Ilir Meta si president nuk e lejon”, tha Kryemadhi.
