Kosova nuk përjashton një izolim të ri, opsion të cilin e shikon të fundit për luftimin e valës së dytë të pandemisë koronavirus. Ministri i shëndetësisë, Armend Zemaj, si për ironi, zgjodhi një vizitë në burgun e Lipjanit për të konfirmuar një gjë të tillë.
Ai u bëri thirrje qytetarëve që të respektojnë masat në fuqi, si mënyrën e vetme për të shmangur një mbyllje të dytë.
“Në politikën e Qeverisë së Republikës së Kosovës dhe në atë që unë e kam përfaqësuar që nga fillimi mbyllja ka qenë gjithmonë opsioni i fundit. Për këtë arsye po iu bëjmë thirrje qytetarëve, bizneseve, mediave, të gjithëve, institucioneve publike dhe qendrore që t’i respektojnë dhe t’i zbatojnë masat sepse mbyllja do të ishte fatale për të gjithë ne. Do të thotë ta bëjmë të pamundurën në menaxhimin e kësaj situate që mos të kemi mbyllje, apo mbyllje klasike siç quhet”, deklaroi Zemaj
Ministri i Shëndetësisë vlerësoi menaxhimin e pandemisë nga institucionet shëndetësore. Sipas tij, protokolli i zbatuar nga Kosova po merret për bazë edhe nga vendet e tjera të rajonit.
“Po tash po e them pa modesti, ne jemi duke u marrë model nga shtetet tjera… Shumë shtete të rajonit, që unë kam bashkëpunim direkt me ta, edhe në krijimin e atij grupi të cilit e kam pasqyruar më herët edhe në shtetet homologe të rajonit, edhe në vendet tjera që jemi në kontakt, disa elemente të masave ata tash i kanë marrë për bazë, me këtë rast kanë marrë edhe udhërrëfyesin të cilin unë e kam nënshkruar për përdorimin e maskës në komunitet dhe mbulesat në fytyrë të cilën janë tash duke e përdorur edhe vendet e rajonit si masë e tyre”, vijoi ai.
Ministri Zemaj, bëri me dije se në bashkëpunim me policinë dhe inspektoratet përkatëse, do të zbatohet një vrojtim me dy faza për respektimin e masave parandaluese për COVID-19, gjatë ditës dhe në mbrëmje. Rritjen e numrit të rasteve ditore e konsideroi të lehtë, por nënvizoi se kjo luftohet vetëm me respektimin e masave në fuqi.
