Pas rishpalljes nga Presidenca të listës së kandidatëve që kanë aplikuar për anëtar të Gjykatës Kushtetuese, edhe Kuvendi ka publikuar kandidatët për këtë institucion.
“Pas rishpalljes nga Kuvendi i Shqipërisë, në datën 24.9.2020, të hapjes së procedurave të aplikimit për vendin vakant për 1(një) anëtar të Gjykatës Kushtetuese, me qëllim plotësimin e “vakancës së parakohshme” të krijuar për shkak të mbarimit para afatit ligjor të mandatit të z.Fatos Lulo, kanë paraqitur kërkesën për shprehje interesi, si dhe dokumentacionin përkatës, kandidatët:
Altin Binaj
Ardita Buna Alsula
Ilir Haznedari”, thuhet në njoftimin e Kuvendit.
Lidhur me publikimin nga Kuvendi ka reaguar edhe ambasadorja amerikane Yuri Kim.
Me anë të një postimi në rrjetet sociale, Kim ka përshëndetur publikimin e listave të kandidatëve për anëtarë në Gjykatën Kushtetuese, nga Presidenca dhe Kuvendi.
Ndërsa inkurajon palët, ambasadorja Kim shkruan se Këshilli i Lartë i Emërimeve ne Drejtesi duhet të veprojë shpejt pasi deri në fund të vitit Gjykata Kushtetuese duhet të jetë konsoliduar.
Deri tani Kushtetuesja ka 4 anëtarë, ndër të cilët 1 ka mandat të përfunduar.
