Një velierë me flamur slloven u gjet e braktisur në zonën e Patokut. Brenda mjetit nuk u gjet asnjë person dhe asnjë dokument.
Sipas abcnews, është konfirmuar se destinacioni i nisjes ka qenë Greqia dhe ai i mbërritjes në Malin e Zi.
Policia dhe Prokuroria kanë dyshime të forta që veliera e gjetur e braktisur në afërsi të Patokut, mund të përdorej për transportim të lëndëve narkotike, pasi është konstatuar një person që ka zbritur nga ky mjet dhe ka hipur në një gomone për të mos u kthyer më.
Kanë qenë këto arsyet për të cilat veliera është mbajtur nën kontroll 24 orë, por nuk është kthyer askush për ta marrë.
Burime policore thonë se jahti me flamur slloven, i përket një shtetasi italian. Pranë jahtit është gjetur dhe një gomone, çka rrit edhe dyshimet për një aktivitet të mundshëm kriminal.
Jahti tip velierë mban emrin TAI-PAN dhe është marrë nga policia kufitare në zonën e Patokut për t’u ankoruar më pas në portin e Shëngjinit dje në orën 20.10.
Pak muaj më parë në vendin tonë u braktis edhe një tjetër jaht, në pronësi të disa shtetasve turq.
Kapiteni i atij mjeti lundrues nuk u gjet, pavarësisht pretendimeve të ndryshme nga ana e familjarëve.
