Pas vrasjes së biznesmenit Niko Goro në Himarë, mëngjesin e sotëm, ka reaguar edhe policia e qytetit.
Ato raportojnë se e afërmja e cila shoqëronte biznesmenin Goro në momentin e atentatit, është plagosur lehtë në këmbë, dhe gjendja e saj është jashtë rrezikut për jetën.
Policia thotë se biznesmeni Goro, 51 vjeç, është qëlluar nga një person ende i paidentifikuar, ndërsa janë ngritur pika kontrolli për kapjen e tij.
Si ndodhi ngjarja
Bazuar në dëshmitë okulare, rreth orës 08:55 të mëngjesit të sotëm, Goro u qëllua me armë zjarri teksa ishte nën shoqërinë e një personi tjetër. Goro ndodhej përpara biznesit të së motrës në momentin kur u qëllua me 5 plumba. Ai ndërroi jetë pasi u transportua në spital.
Sipas dëshmitarëve, personi i cili qëlloi ndaj biznesmenit, ishte me kapele dhe me maskë. Ky i fundit, mësohet se zbriti nga një furgon ku ndodheshin edhe tre persona të tjerë. Pasi qëlloi drejt biznesmenit, autori hipën sërish në furgon dhe largohet në drejtim të paditur.
Njoftimi i Policisë:
Më datë 17.10.2020, rreth orës 08.55 minuta në vendin e quajtur rrethrrotullimi që të çon në lagjen Spille Himarë, nga një person ende i pa identifikuar është vrarë me armë zjarri shtetasi N.G, 51 vjeç. Si pasojë është plagosur lehtë në këmbë edhe shtetasja E. Q., 57 vjeçe, jashtë rrezikut për jetën.
Shërbimet e Policisë kanë shkuar menjëherë në vendngjarje, janë ngritur pika kontrolli në aksin rrugor Himarë – Borsh e Himarë – Vlorë.
Në ndihmë të Policisë Vendore janë nisur forcat Operacionale dhe Shqiponjat e DVP Vlorë.
Në vendngjarje ka shkuar grupi hetimor dhe nën drejtimin e Prokurorisë po vijon puna për zbardhjen e rrethanave të ngjarjes, identifikimin dhe kapjen e autorëve.
LEXO EDHE:
Vrasja e biznesmenit/ Si u ekzekutua dhe dyshimet për krimin
