Një vrasje me armë zjarri ka tronditur Himarën këtë të Shtunë, ku është ekzekutuar me armë zjarri ndërtuesi Niko Goro dhe është plagosur e motra e tij.
Krimi
Sipas një rindërtimi paraprak të ngjarjes nga policia, bazuar dhe në dëshmitë e marra, ora shënonte rreth 08:55 kur biznesmeni, kushëri me kryebashkiakun e Himarës, u qëllua me armë zjarri.
Niko Goro, 51 vjeç, ndodhej para marketit të së motrës, kur ndaj tij u qëllua disa herë me armë zjarri. Goro mbeti i vdekur, ndërsa e motra u plagos.
Personi që qëlloi me armë zjarri, sipas dëshmitarëve, ishte me maaskë dhe kapele. Ai zbriti nga një automjet tip fugon ku dyshohet se ndodheshin dhe tre persona të tjerë, iu afrua Goros dhe qëlloi me armë zjarri ndaj tij. Pas të shtënave, hipi sërish në automjet dhe u largua nga vendngjarja.
“Rreth orës 08.55 minuta në vendin e quajtur rrethrrotullimi që të çon në lagjen Spille, nga një person ende i pa identifikuar është vrarë me armë zjarri shtetasi N.G, 51 vjeç. Si pasojë është plagosur lehtë në këmbë edhe shtetasja E. Q., 57 vjeçe, jashtë rrezikut për jetën”, thuhet në njoftimin paraprak të policis.
Hetimet
Një grup hetimor është ngritur për zbardhjen e krimit. Disa persona janë pyetur nga policia në cilësinë e dëshmitarëve, ndërsa do vëzhgohen dhe kamerat në zonë për të çuar në identifikimin e autoreve, që deri më tani mbeten të panjohur më policinë. Ndërkohë, pika kontrolli janë ngritur nga policia për kapjen e tyre.
“Shërbimet e Policisë kanë shkuar menjëherë në vendngjarje, janë ngritur pika kontrolli në aksin rrugor Himarë – Borsh e Himarë – Vlorë. Në ndihmë të Policisë Vendore janë nisur forcat Operacionale dhe Shqiponjat e DVP Vlorë. Në vendngjarje ka shkuar grupi hetimor dhe nën drejtimin e Prokurorisë po vijon puna për zbardhjen e rrethanave të ngjarjes, identifikimin dhe kapjen e autorëve”, njoftoi policia.
Konfliktet në fushën e biznesit janë një nga pistat e hapura nga grupi hetimor për vrasjen e binzesmenit, që ishte pronar i një lokali dhe një hoteli në Himarë.
