Kryetari i Partisë Demokratike, Lulzim Basha akuzoi sërish këtë të Premte se, koncesionet e inceneratorëve janë një skemë mafioze e zhvatjes së parave publike.
Basha solli në kujtesë se janë dhënë “75 milion euro për inceneratorë që nuk punojnë e s’kanë asnjë punëtor”.
Çfarë lidhje ka Klodian/Mirel Mërtiri dhe Klodian Zoto me Ramën, Veliajn e Ahmetajn – pyeti Basha.
Kryedemokrati i bëri apel dhe kreut të SPAK të informojë për ecurinë e hetimeve për inceneratorët.
“Arben Kraja të dalë e të prononcohet publikisht në cilin stad ndodhen hetimet për inceneratorët për Fierin, Tiranë dhe Elbasanin”, tha Basha.
“Rama i ka dhënë dhjetëra milionë euro një personi që është pronar i 3 inceneratorëve në Fier, Elbasan, Tiranë. Në Tiranë, kompania është regjistruar një ditë pasi të lidhte kontratën, e kuptoni apo jo? S’ekzistonte dhe është regjistruar. Pa asnjë përvojë në fushën e administrimit të mbetjeve. Në Fier, bashkë me një kompani italiane me eksperiencë në fushën e menaxhimit të mbetjeve, ia ka blerë kuotat kompanisë italiane për 200 mijë lekë të vjetra, dhe e ka prapë i njëjti peron me një zinxir kompanish guaskë në parajsat fiskale.
As në Fier dhe as në Tiranë nuk ekzistojnë inceneratorë, në Elbasan s’është marrë në dorëzim nga bashkia se nuk plotëson kushtet e kontratën. 75 mln euro nga paratë e shqiptarëve janë përfituar në këtë aferë korruptive”, u shpreh Basha në një konferencë për gazetarët.
“Cila qeveri në botë mobilizohet dhe bën 17 vendime brenda ditës me një kompani pa përvojë me kapital 1 mijë euro?! Si mund të mblidhet brenda ditës për ti dhënë 14 mln euro një personi me 1 mijë euro në xhep. Çfarë e lidh Ramën me Klodian apo Mirel Mërtirin dhe Klodian Zoton? Çfarë eksperience kanë? Pse u janë dhënë miliona euro pa pasur asnjë investim nga kompanitë, pa pasur asnjë kosh plehrash, pa një makinë plehrash. Pse nuk janë botuar në Fletoren Zyrtare kontratat për inceneratorët e Fierit e Tiranës. Muajin e kaluar, MF përpos KLSH-së, njoftoi se ndonëse ka përlarë dhjetëra milionë euro, inceneratorët s’kanë investuar as 12 përiqnd të fondit. Çfarë janë këta që marrin dhjetra milionë euro në kohë pandemie dhe nuk investojnë”, shtoi Basha.
Ai solli në vëmendje dhe denoncimet e mëparshme të PD-së për inceneratorët e Fierit e Tiranës.
