Një 29-vjeçar që posedonte dhe shpërndante lëndë narkotike, është vënë në pranga, raportoi këtë të Enjte policia e Tiranës.
Efektivët kanë sekuestruar një sasi kokaine e kanabisi, një shumë parash si dhe 2 peshore elektronike e 4 aparate celular.
“Seksioni për Hetimin e Narkotikëve, mbi bazën e informacioneve të marra në rrugë operative për shitjen e lëndëve narkotike të llojit kokainë dhe kanabis sativa, ka organizuar dhe finalizuar një operacionin për goditjen e kësaj veprimtarie kriminale, si rezultat i të cilit u bë arrestimi në flagrancë i shtetasit: F.Z., 29 vjeç, banues në Tiranë”, njoftoi policia.
Të njëjtat burime shtuan se, bazuar në informacionet e marra në rrugë operative se shtetasi F.Z. merrej me shitjen e lëndëve narkotike të llojit kokainë dhe kanabis sativa, shërbimet e Policisë kanë ndërhyrë në rrugën “Don Bosko”, duke ushtruar kontroll fizik ndaj tij, në banesën e tij dhe në një parking në afërsi. Si rezultat i këtyre kontrolleve janë gjetur dhe sekuestruar rreth 2.5 kg lëndë e dyshuar kanabis sativa, një pjesë e së cilës e ndarë në doza gati për shitje, një sasi kokaine, një shumë parash të dyshuara të përfituara nga kjo veprimtari kriminale, dy peshore elektronike dhe katër aparate celular.
Ndaj të riut është ngritur akuza për veprën penale “Prodhimi dhe shitja e narkotikëve”.
