Kryetari i Partisë Demokratike, Lulzim Basha deklaroi këtë të Enjte se me “aferat e inceneratorëve”, po grabiten paratë e shqiptarëve. Basha i kërkoi prokurorëve të SPAK-ut të hetojnë për rastet ose të japin dorëheqjen.
“Anëtarët e SPAK të nisin hetimet për aferën 400 milionë ose të japin dorëheqjen. Çfarë presin? Të marrin njerëzit fatin e tyre në dorë? Sot duhet të dalin edhe t’i thonë shqiptarëve a kanë filluar apo jo hetimin. Ky krim i rëndë duhet të ishte hetuar. Ndërkohë vazhdon vjedhja. Javën e kaluar u paguan 2 milionë Euro dhe s’lëviz gishtin asnjë prokuror. Ky është një krim i rëndë kundër shqiptarëve”, deklaroi Basha.
Gjatë një bisedimi me gazetarët, Basha tha se Rama vazhdon të vjedhë paratë e taksapaguesve, që duhet të shkonin sot në ndihmë të atyre që humbën punën për shkak të pandemisë, tek pensioninstët, tek bizneset e vogla që po falimentojnë dhe grupe të tjera në vështirësi ekonomike.
Ai e quajti qeverinë “një grup të strukturuar kriminal” me në krye Ramën, Veliajn, Ahmetajn dhe sipërmarrësin Klodian Mërtiri që sipas Bashës, po vjedhin qindra miliona euro përmes skemës së inceneratorëve.
Kryedemokrati përmendi dhe raportin e Ministrisë së Financave që raportoi se nga 75 milion euro që janë akorduar për inceneratorët, një pjesë e vogël është investuar në to.
Basha akuzoi qeverinë për keqmenaxhimin e situatës së pandemisë, raportim të statistikave fiktive si dhe i bëri apel zbatimin e planit të PD-së për “Rimëkëmbjen Ekonomike”.
Lexo edhe:
