Instituti i Studimeve Politike ka ngritur shqetësimin e menaxhimit të punimeve të Kuvendit nëpërmjet mbledhjeve online përgjatë pandemisë.
Në një varg kritikash, është prekur gjithashtu edhe rasti i deputetit Ilir Beqaj, i cili në fillim të një mbledhjeje është parë në ambientet e zyrës së tij, teksa më vonë ka dalë për t’u drejtuar drejt makinës. Beqaj gjithashtu ka qenë edhe aktiv në diskutimet, duke sugjeruar nene për të pranishmit.
“Në një mbledhje të rëndësishme të muajit tetor 2020 të Komisionit parlamentar mbi veprimtarinë prodhuese deputeti Ilir Beqaj merr pjesë aktive në debat duke qenë në zyrë (minuta e 12.49) dhe më pas del nga zyra, hip në makinë dhe vijon të marrë pjesë aktive në debat ndërsa udhëton në makinë (minuta 58.28) e videos së komisionit. Edhe në rastin konkret deputeti vijon nga makina të komentojë nene dhe të japë sugjerime, duke supozuar se e ka ligjin në dorë dhe po punon me të, ndërsa kolegët në komision dhe ekspertët e thirrur i komentojnë sugjerimet e tij! Sesi mund të ndiqet një debat parlamentar duke dalë nga zyra drejt makinës dhe duke udhëtuar me makinë, sesi mund të diskutohet mbi nene e vendime që prekin interesa të mëdha qytetare, sesi mund të ushtrohet pushteti legjislativ në forma të tilla, vetëm modele parlamentare si këto mund të na thonë”, shkruan ISP.
ISP ka theksuar se praktika të tilla duhet të marrin fund.
https://www.facebook.com/isp.com.al/photos/a.685716698138019/3434286376614357/?type=3&theater
