“Afera e inceneratorëve nuk është thjesht korruptive, por është afera e pastrimit të parave, e dënueshme nga Kodi Penal”, u shpreh kreu demokrat, Lulzim Basha.
Ai tha se afera e inceneratorëve është testi kryesor për institucionet e reja të drejtësisë.
“Ashtu si media, edhe këto institucione janë sot nën presionin politik, por do të çlirohen pas 25 prillit dhe do të hetojnë një nga një këtë aferë. Kjo është një nga aferat më të zeza në 30 vjet, qindra miliona euro të dedikuara për inceneratorët do të kishin mjaftuar për të ndihmuar dhe çliruar mijëra familje shqiptare”, tha Basha.
Kreu demokrat tha se kjo aferë as nuk do të harrohet dhe as nuk mund të fshihet, por do të hetohet deri në fund, pasi nuk është thjesht korruptive, por është afera e pastrimit të parave.
“Paratë e inceneratorëve do të gjurmohen kudo që kanë shkuar dhe do t’u kthehen shqiptarëve”, tha ai.
