Është mbyllur në barazim 0-0 takimi mes Kazakistanit dhe Shqipërisë e vlefshme për Grupin 4 të Ligës së Kombeve.
Pas humbjes turpëruese në shtëpi ndaj Lituanisë, kuqezinjtë marrin një tjetër rezultat zhgënjyes, teksa objektivi sot ishte marrja e tre pikëve për tu ngjitur në krye të grupit.
Pjesa e parë u karakterizua nga një lojë e dobët e të dyja skuadrave, ku kombëtarja jonë u shfaq e paorganizuar në mesfushë, teksa ra në sy mungesa e aksioneve të rrjedhshme.
I vetmi moment pozitiv erdhi në minutën e 8-të teksa Shqipërisë iu mohua goli nga traversa. Pas një harkimi të Trashit nga goditja e këndit, futbollistët kazak për pak sa nuk shënuan në portën e tyre, por për fatin tonë të keq sfera përfundoi në traversë.
Në pjesën e dytë u vu re një Shqipëri më kërkuese kjo edhe falë gafave të vendasve. Mundësitë më të mira për shënim i pati sulmuesi 18-vjeçar Armando Broja, por në mungesë edhe të eksperiencës nuk arriti të finalizojë.
Një tjetër rast i artë ishte ai i Seferit. Sulmuesi, i cili debutoi në këtë takim, u shërbye mjaft mirë nga Broja dhe i vetëm përballë portierit, nuk ia doli të shënojë. Raste që në fund rezultuan fatale, pasi takimi u mbyll i bardhë 0-0, një rezultat që kënaqi vetëm vendasit
Nga ana tjetër, trajneri italian Reja, u tregua besnik i formacionit të hedhur nga minuta e parë pavarësisht ngërçit të skuadrës. Mjaftojmë të përmendim që dy zëvendësimet e para erdhën në minutën e 82-të, aty ku Trashi dhe Manaj lanë fushën e lojës për t’i lënë vendin Memollës dhe Seferit.
Gjithsesi të dy ekipet ndajnë kështu nga 1 pikë, duke kryesuar përkohësisht Grupin 4, në pritje të takimit tjetër mes Lituanisë dhe Bjellorusisë që do të zhvillohet në orën 18:00.
